తాడేపల్లి స్క్రిప్ట్‌తోనే కడపలో వైసీపీ కార్యకర్త హత్య: మంత్రి నిమ్మల రామానాయుడు

ఆంధ్రప్రదేశ్‌లో అధికారం, ఆస్తులు, డబ్బు కోసం ఎంతకైనా తెగించే ఒక ‘విష సంస్కృతిని’ వైసీపీ, ఆ పార్టీ అధ్యక్షుడు జగన్ ప్రవేశపెట్టారని రాష్ట్ర జలవనరుల శాఖ మంత్రి నిమ్మల రామానాయుడు తీవ్రస్థాయిలో ధ్వజమెత్తారు. కడపలో వైసీపీ కార్యకర్త పెద్ద దస్తగిరి హత్య వెనుక తాడేపల్లి ప్యాలెస్ స్క్రిప్ట్ ఉందని, సొంత పార్టీ శ్రేణులనే రాజకీయ ప్రయోజనాల కోసం బలి చేస్తున్నారని ఆయన ఆరోపించారు. సోమవారం మంగళగిరిలోని టీడీపీ కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడుతూ.. వైఎస్ వివేకానంద రెడ్డి హత్య నుంచి పెద్ద దస్తగిరి హత్య వరకు అంతా ఒకే పద్ధతిలో జరుగుతోందన్నారు.

హత్యల వెనుక ఒకే పంథా
"రాజకీయ లబ్ధి కోసం సొంత బాబాయినే గొడ్డలిపోటుతో హతమార్చిన చరిత్ర ఆ పార్టీది. అదే బాటలో నేడు కార్యకర్తల ప్రాణాలను కూడా బలితీసుకుంటున్నారు" అని రామానాయుడు మండిపడ్డారు. కడపలో పార్టీ కోసం అహర్నిశలు శ్రమించిన దస్తగిరిని నిర్దాక్షిణ్యంగా పొట్టనబెట్టుకున్నారని ఆవేదన వ్యక్తం చేశారు. జగన్మోహన్ రెడ్డికి అత్యంత సన్నిహితుడైన మాజీ డిప్యూటీ మేయర్ నిత్యానంద రెడ్డి తన రూ.100 కోట్ల రియల్ ఎస్టేట్ లావాదేవీలకు అడ్డుగా ఉన్నాడనే కారణంతోనే దస్తగిరిని హత్య చేయించారని ఆరోపించారు. 

"వివేకా హత్య జరిగినప్పుడు రక్తపు మడుగులో ఉన్న మృతదేహాన్ని గుండెపోటుగా చిత్రీకరించి, సాక్ష్యాలను ఎలా తుడిచిపెట్టారో, నేడు దస్తగిరి హత్య విషయంలోనూ అదే పంథాను అనుసరిస్తున్నారు. హత్య చేసిన నిందితులు నేరుగా వెళ్లి నిత్యానంద రెడ్డిని కలవడం చూస్తుంటే, ఈ హత్యల వెనుక ఎవరి అండదండలు ఉన్నాయో స్పష్టమవుతోంది. రాష్ట్రంలో హత్యారాజకీయాలకు, గొడ్డలి సంస్కృతికి వైసీపీ కేరాఫ్ అడ్రస్‌గా మారింది" అని నిమ్మల విమర్శించారు.

జగన్‌ది రాజకీయ ఆలోచన కాదు, క్రిమినల్ మైండ్
వైఎస్సార్సీపీ అధినేత జగన్‌ది రాజకీయ ఆలోచన కాదని, అది పక్కా ‘క్రిమినల్ మైండ్’ అని మంత్రి తీవ్రంగా విమర్శించారు. గతంలో జగన్ పరామర్శ యాత్రలో జరిగిన ఘటనను గుర్తుచేస్తూ, "సాధారణంగా రోడ్డు మీద ఎవరైనా ప్రమాదానికి గురైతే మానవత్వంతో ఆసుపత్రికి పంపిస్తాం. కానీ జగన్ తన కాన్వాయ్ చక్రాల కింద సొంత కార్యకర్త నలిగి చనిపోతుంటే, కారు కింద నిమ్మకాయ నలిగినట్లుగా భావించి, ఆ శవాన్ని పొదల్లోకి విసిరేసి వెళ్లారంటే ఆయనలో మానవత్వం ఉందా?" అని ప్రశ్నించారు. 

అధికారం, డబ్బు తప్ప జగన్‌కు మరేమీ కనిపించవని, తన ప్రయోజనాల కోసం తల్లి, చెల్లి, బాబాయ్, కార్యకర్త ఎవరైనా ఆయన దృష్టిలో ఒక వస్తువు మాత్రమేనని దుయ్యబట్టారు. 2018 నాటి ‘కోడికత్తి’ డ్రామాతో సానుభూతి పొంది, ఆ కేసులో నిందితుడైన ఒక దళిత యువకుడి జీవితాన్ని బలిపెట్టారని గుర్తుచేశారు.

ఓడినా మారని తీరు.. బెదిరింపుల పర్వం
2024 ఎన్నికల్లో ప్రజలు బుద్ధి చెప్పి ఓడించినా జగన్‌లో మార్పు రాలేదని రామానాయుడు అన్నారు. తనను ఓడించారనే కక్షతో ఆంధ్రప్రదేశ్ అభివృద్ధి చెందకూడదని, ప్రజలు సుఖంగా ఉండకూడదని కోరుకుంటున్నారని ఆరోపించారు. ఓటమి తర్వాత తప్పులు సరిదిద్దుకుంటామని చెప్పాల్సింది పోయి, "చంపేస్తాం, నరికేస్తాం, అంతు చూస్తాం" అంటూ వీధి రౌడీల్లా మాట్లాడుతున్నారని మండిపడ్డారు. ఇది ప్రజాస్వామ్యంలో ఉండే పార్టీ లక్షణం కాదన్నారు. ప్రశాంతంగా ఉన్న రాష్ట్రంలో మళ్ళీ చిచ్చు పెట్టాలని, అభివృద్ధికి అడ్డుపడాలని జగన్ ప్రయత్నిస్తున్నారని ఆవేదన వ్యక్తం చేశారు.

"జగన్ రెడ్డి గారూ.. మీ నేతలు చేసే ప్రతి కబ్జా, ప్రతి సెటిల్మెంట్ వాటా తాడేపల్లికి చేరుతున్న మాట వాస్తవం కాదా? మీ ధనదాహానికి అడ్డు తగిలితే సొంత కార్యకర్తలైనా చంపేస్తారా?" అని నిమ్మల సూటిగా ప్రశ్నించారు. వైసీపీ కార్యకర్తలు ఒక విషయం గమనించాలని, జగన్ వారిని కేవలం ‘పనిముట్లు’గా వాడుకొని అవసరం తీరాక దస్తగిరిలా గాలికి వదిలేస్తారని హెచ్చరించారు. అభివృద్ధిని అడ్డుకోవడం, ప్రజలను బెదిరించడమే లక్ష్యంగా పెట్టుకున్న వైసీపీ ‘గొడ్డలి పార్టీ’గా, ‘రప్పా రప్పా’ పార్టీగా మారిందని ఎద్దేవా చేశారు. ఈ ‘రౌడీ రాజకీయం’ ఇకపై సాగదని, గొడ్డలి సంస్కృతికి ఆంధ్రప్రదేశ్ ప్రజలు శాశ్వతంగా సమాధి కట్టడం ఖాయమని హెచ్చరించారు.